دوشرگه dusharge

                                يئنيليکچي دوشونجه و شاعيرلر

                             گيوم آپولينئر                             چئويرن: ائراي جانبئرک

   
  شاعير، يئني جوشغولار کشف ائدن کيمسه دير؛ بو يئني جوشغولارا دؤزمک چتين ده اولسا هر ساحه ده شاعير اولونا بيلر؛ يئتر کي اينسان ماجراچي اولسون و تاپيب چيخارماغي گؤزه آلسين.  
  صنعتين وسايطي و واسيطه لريني مئيدانا گتيرن شئي اوچون، خيالا دالماياجاق بير بوللوغون آزادليغي ايچينده اولدوغوموزو اوميد ائده بيلريک. شاعيرلر بو گون، بو آنسيکلوپئديک آزادليغين شاگيردليک دؤورونو ياشاييرلار. ايلهام ساحه سينده آزادليقلاري؛ بير تک صحيفه ده ان موختليف وسايط لري اله آليب ايشله ين، ان اوزاق اؤلکه لرده آت قاچديران گونده ليک بير قزئتين آزادليغيندان داها آز گئنيش دئييل. تئلئفونون، تئلسيز تئلقرافين و کوسموس قارشيسيندا آرتيق اوتانجاقليغي قالمايان هاواچيليغين وار اولدوغو بير چاغدا، شاعير هئچ اولماسا عئيني آزادليغا نه اوچون صاحیب و مجبوري اولماسين سواليني اؤز اؤزوموزه سوروشماليييق.  
  کاينات کيمي، توپلولوق کيمي، ميلت کيمي کومپلئکس {پيچيده} وارليقلاري، تئزليک و آسانليقلا تک سؤزله ايضاح ائتمه يي ورديش حالينا گتيرميشدير دوشونجه لر. حال بو کي تئزليک و آسانليغين شعرده چاغداش معنادا قارشيليقلاري يوخدور. شاعيرلر بو بوشلوغو دولدورماق مجبوريتينده ديرلر و اونلارين ساختا شعرلري، اورتاق شکيلده تئرمينلر کيمي بير آرايا گتيريلميش اينجه (پلاستيک) بير ديره صاحیب اولان يئني اؤزلوکلر يارادار.  
  اينسان، ماشين دئييلن بو چاشديريجي وارليقلارلا ايچلي ديشلي اولدو. سونسوز درجه ده کيچيک اولانلارين ساحه سيني ديديک ديديک ائتدي. يئني ساحه لر ده اينسانين خيالي نين فعاليتينه آچيلير. بو دا سونسوز اولاراق بؤيويون و اولاجاغي خبر وئرمه نين ساحه لريدير.  
  يئنيليکچي دوشونجه نين کومپلئکس، دورغون، ساختا و دونموش اولدوغونو سانمايين. طبيعتين نيظاميني بئله ايزله ين شاعير، شيشيريلميش بوش سؤزلردن تاماميله خيلاص اولدو. آرتيق ايچيميزده واگنئر آلمانياسي'نين او نهنگ کيمي جوشومجولوغونون بير طرفه بوراخيلميش کؤهنه گئييميني اؤزلريندن اوزاغا آتديلار؛ اونون گؤز آلدادان پارلاقليغينا آلداناراق، ژان ژاك روسو قدر دير وئرميشديک.  
  صنعت آنجاق، گونون بيرينده کاينات عئيني اقليم آلتيندا ياشاسا، اينسانلار عئيني شکيلده تيکيلميش سيغيناجاقلاردا اوتورسالار، عئيني سؤيله ييشي داشييان عئيني ديلي دانيشسالار، ميللي اولماقدان خيلاص اولاجاق؛ بو دا هئچ بير زامان اولماياجاق. ائتنيک و ميللي فرقليليکلر ادبي ايضاحاتين چئشيدلييني دوغورار و قورونماسي لازيم اولان دا ايندي بو موختليفليکدير.  
  چاغداش بير شاعير بير طياره نين خومورتولاريني قلمه آلديغيندا، هر شئيدن اول، ذئهنيني گئرچه يه آليشديران شاعير آرزوسونا صاحیب اولماق لازيمدير. شاعيرين حقيقت احتيراسي اونو هاراداسا علمي دئييله بيله جک قئيدلر آلماغا ايتله ير؛ اگر شعر اولاراق اورتايا قويماق ايسته ييرسه بونلار هر زامان گئرچه يين گئريسينده قالاجاق، دئيک کي قولاق آلداديجي اولاجاق.  
  يئنيليکچي دوشونجه، اينساني، بير گله جکدن خبر وئريجي نين سعيي ايچينه گيرمه يه مجبور ائدير.  
  ايندي بونون اوچوندور کي يئنيليکچي دوشونجه يه گؤره حاضيرلانميش اثرلرين چوخوندا گله جکدن خبر وئريجي ليين ايزلريني تاپا بيليرسينيز. حياتين و خيالين تانريسال اويونلاري يئني بير شعرسل ائتکين لييي تاماميله سربست بوراخير.  
  شعر و ياراديجيليق، اولسا اولسا تک بير شئي دير ائله ايسه؛ اينسانين يارادا بيلدييي اؤلچوده، ايجاد ائدن، يارادان آدامدير دئيه شاعيري آدلانديرماق لازيمدير. شاعير، يئني جوشغولار کشف ائدن کيمسه دير؛ بو يئني جوشغولارا دؤزمک چتين ده اولسا هر ساحه ده شاعير اولونا بيلر؛ يئتر کي اينسان ماجراچي اولسون و تاپيب چيخارماغي گؤزه آلسين.  
  چاغداش شاعيرلر ياراديجي، کشف ائديجي و گله جکدن خبر وئريجي ديرلر؛ صاحیب اولدوقلاري اورتاقلاشمانين ان بؤيوک فايداسي اوچون دانيشديقلاري زامان سؤيله ديکلري نين آراشديريلماسيني ايستيرلر. افلاطونا دوغرو دؤنرلر و اونا يالوارارلار؛ رئسپوبليکادان سوروب چيخاريلسالار بئله هئچ اولماسا اونلارا قولاق آسيلار.  
  يئنيليکچي دوشونجه، هر شئيدن اول، دوستورلارين (فورموللار) ائستئتيزمي نين و بوتون بير مودابازليغين دوشمنيدير. بئله سي بير مکتبه قارشي دؤيوشمکدن کنار دئييل. چونکي اؤزو بير مکتب اولماق ايسته مز آمما سيمگه چيليکدن و دوغالچيليقدان (ناتوراليزم) بو يانا بوتون مکتبلري احاطه ائدن بؤيوک آخينلاريندان بيري دير ادبياتين. چاغي نين آيدينليق قاوراياجيليغي اوچون؛ کايناتين ايچي و ديشاريسي مؤضوعسوندا يئني گؤروشلر گتيرمک اوچون، اؤن آياق اولوجو دوشونجه نين يئرلشمه سي اوچون دؤيوشر...  
  يئنيليکچي دوشونجه، ياشاديغيميز چاغين يئنيليکچي دوشونجه سيدير عئيني زاماندا. چاشديريجيليقلار قونوسوندا وئريملي (محصولدار) اولان بير چاغ. شاعيرلر، گله جکدن خبر وئريجيلييه؛ بو هئچ جور ائوجيللشديريله بيلمه ين اله اوووجا سيغماز قيسراغا بنزه ين شئيه بويون اَيديرمک نيتينديلر.  
   

  • آذربايجان تورکجه سينه اويغونلاشديران: همت شهبازي  
   

يازار هـ.شهبازی یکشنبه 1387/12/04 ساعت 0:59 /لینک/(نقل با قيد منبع وبلاگ آزاد است)